Kontent qismiga oʻtish

Commerzbank

ZiyoSfera, erkin ensiklopediya
Commerzbank
Asosiy maʼlumotlar
Turi Ochiq aksiyadorlik jamiyati
Birja listingi FWB: CBK
DAX
Asos solingan 26-fevral, 1870-yil (156 yil avval) (1870-02-26), Gamburg
Boyligi
Aktivlari 603.3 milliard
Sof foydasi €2.7 milliard
Xodimlari 49 410
Auditor KPMG AG

Commerzbank — bosh ofisi Germaniyaning Frankfurt shtatida joylashgan boʻlib tijorat banki hisoblanadi. Aktivlarining hajmi boʻyicha (taxminan 507 milliard yevro) bank Germaniyada uchinchi oʻrinni, Yevropada esa yigirma uchinchi oʻrinni egallaydi. Bankning 49 410 nafar xodimi dunyoning qariyb 50 ta mamlakatida 11 milliondan ortiq xususiy va 70 mingta korporativ mijozlarga xizmat koʻrsatadi. Germaniyada bankning 1000 ga yaqin boʻlimi bor, xorijda esa 20 ta operativ filiali faoliyat yuritadi[1]. Germaniyaning uzoq yillik tarixga ega boʻlgan yirik moliya muassasasi, Commerzbank mamlakat iqtisodiyotida muhim rol oʻynaydi. U Germaniya tashqi savdosining eng yirik moliyachisi boʻlib, mamlakatdagi kichik va oʻrta biznes subyektlari bilan mustahkam aloqalarga ega. Shuningdek, bank butun dunyodagi barcha yirik iqtisodiy va moliyaviy markazlarda oʻz faoliyatini yuritadi. 1971-yilda u Nyu-York shahrida oʻz filialini ochgan Germaniyadagi birinchi bank muassasasiga aylandi[2][3][4].

Tarixi

Teodor Ville — „Hamburger Commerz- und Diskonto-Bank“ asoschisi

Bankka 1870-yil 26-fevralda Gamburg shahrida „Commerz- und Discontobank“ nomi bilan asos solingan. 1892-yilda u Berlinda oʻz boʻlimini ochdi va sekin-asta bank faoliyatining asosiy markazi Germaniya poytaxtiga koʻcha boshladi. 1904-yilda „Berliner Bank“ni oʻziga qoʻshib olgach, Commerzbank Germaniya iqtisodiyotining moliya sohasida yetakchilik qiluvchi Berlin banklari qatoridan joy oldi. Birinchi jahon urushi va undagi magʻlubiyatdan keyin yuzaga kelgan iqtisodiy inqiroz yillarida bank kichikroq banklarni sotib olish hisobiga juda tez kengaydi. Masalan, 1913-yilda uning bor-yoʻgʻi 8 ta boʻlimi boʻlgan boʻlsa, 1924-yilga kelib ularning soni 246 taga yetdi. 1920-yillarning ikkinchi yarmida bank Amerikaning „Chase National Bank“i tomonidan Germaniya sanoat korxonalariga kiritiladigan investitsiyalarni joylashtirishda asosiy vositachiga aylandi. 1940-yilda bankning nomi Commerzbank deb oʻzgartirildi. 1944-yilga kelib, Berlinning eng yirik oltita bankining aktivlari 28 milliard markani tashkil etgan boʻlib, bu mamlakatdagi qolgan barcha banklarning umumiy mablagʻidan koʻproq edi. Bundan tashqari, ushbu banklarning oʻz vakillari mamlakatning Krupp, Siemens va IG Farben kabi koʻplab yetakchi konsernlari boshqaruv hayʼati tarkibida bor edi.

  • Bankning Gamburgdagi joylashgan birinchi bosh binosi, 1886-yil[5]
    Bankning Gamburgdagi joylashgan birinchi bosh binosi, 1886-yil[5]
  • Shu binoning 2006-yildagi rasmi
    Shu binoning 2006-yildagi rasmi

Ikkinchi Jahon Urushidan soʻng

Ikkinchi jahon urushi tugagandan soʻng, yirik banklar 30 ta kichik bankka boʻlib tashlandi. 1958-yilga kelib, Commerzbank oʻzining avvalgi nufuzi va taʼsirini deyarli toʻliq tiklab oldi. Uning bosh qarorgohi Dyusseldorf shahrida joylashgan edi, biroq 1970-yillardan boshlab asosiy amaliyotlar markazi Frankfurtga koʻcha boshladi[6]. Shuningdek, 1960-yillarning oxiridan eʼtiboran bank oʻz faoliyatini xorijda ham kengaytirishga kirishdi. 1970-yilda bank oʻz amaliyotlarini Fransiyaning „Credit Lyonnais“ va Italiyaning „Banco di Roma“ (Rim banki) banklari bilan birlashtirdi. Natijada Yevropada aktivlari 18 milliard dollarga teng boʻlgan hamda 3 mingta boʻlimga ega eng yirik bank sindikati vujudga keldi. Biroq ushbu davlatlar hukumatlari qarshilik koʻrsatgani sababli, banklarning butunlay qoʻshilib ketishi yaʼni toʻliq birlashishi amalga oshmadi[7][8]. 1973-yilda bankning Yaponiyada, 1974-yilda esa Indoneziyada filiali ochildi. Umuman olganda, bankni kengaytirish siyosati muvaffaqiyatsiz boʻlib chiqdi. 1970-yillarning oxiriga kelib, bank moliyaviy qiyinchiliklarga duch kela boshladi va korxonalar hamda kompaniyalardagi oʻz ulushlarini sotishga majbur boʻldi. 1980-yilda bank oʻz tarixida birinchi marta aksiyadorlariga dividendlar (foyda ulushi) toʻlamadi. Rahbariyatning almashishi 1980-yillarning oʻrtalariga kelib bankning moliyaviy ahvolini tiklashga yordam berdi. 1990-yildan boshlab u Germaniyaning „katta uchlik“ banklari orasida eng faol tarzda Sharqiy Germaniya bozorini oʻzlashtirishga kirishdi va u yerda birdaniga 120 ta boʻlim ochdi[9][10].

Zamonaviy davr

1995-yilda bank Buyuk Britaniyaning fondlarni boshqarish bilan shugʻullanuvchi „Jupiter Tyndall“ kompaniyasining 75 foizlik ulushini sotib oldi[11]. 2008-yilda „Allianz“ sugʻurta kompaniyasidan 5,5 milliard yevro evaziga „Dresdner Bank“ sotib olindi[12]. Shu bilan bir vaqtda, Commerzbank 2007—2008-yillardagi moliyaviy inqiroz paytidagi zararlarni qoplash uchun oʻz aksiyalari paketi evaziga Germaniya hukumatidan 18 milliard yevro miqdorida yordam oldi. 2018-yil holatiga koʻra, Germaniya hukumatining bank ustav kapitalidagi ulushi 16,5 foizni tashkil etgan. 2018-yilda Commerzbank va Deutsche Bank oʻrtasida birlashish boʻyicha muzokaralar olib borildi. Biroq, 2019-yilning aprel oyida har ikkala bank qoʻshimcha xavf-xatarlar hamda tarkibiy oʻzgarishlardagi xarajatlari tufayli bu rejalardan voz kechilganini eʼlon qildi. 2019-yilda ommaviy axborot vositalarida (OAV) Germaniya hukumati Commerzbankni Niderlandiyaning „ING Groep NV“ moliya konserni bilan birlashtirish imkoniyatlarini oʻrganayotgani haqida xabarlar tarqaldi. Bunda birlashish jarayoni 2020-yildan barvaqt sodir boʻlmasligi, yangi tashkil etiladigan bankning bosh ofisi esa Germaniyada joylashishi taxmin qilingan edi. 2021-yil 28-yanvarda Commerzbank keng koʻlamli tarkibiy oʻzgarishlar boshlanganini eʼlon qildi. Unga koʻra, 2024-yilga qadar 10 ming nafar xodimni (oʻsha vaqtdagi jami ishchilarning 20 foizdan ortigʻini) qisqartirish, shuningdek, bank boʻlimlarining deyarli yarmini yopib, ularning sonini 800 tadan 450 taga keltirish rejalashtirilgan edi[13][14] . 2024-yil may oyida Sankt-Peterburg va Leningrad viloyati Arbitraj sudi Commerzbankning Rossiyadagi shoʻba korxonasi aktivlarini qariyb 94 million yevro miqdorida hibsga oldi. Ushbu hibsga olish „Rusximalyans“ MChJ daʼvosi boʻyicha taʼminlash chorasi sifatida amalga oshirildi. Commerzbank „Deutsche Bank“ bilan birgalikda Ust-Luga yaqinida gazni qayta ishlash majmuasini qurayotgan „Linde“ kompaniyasining kafili sifatida ishtirok etgan edi. Qurilish ishlari sanksiyalar tufayli toʻxtab qolgan. 2024-yil 11-sentabrda UniCredit banki Commerzbank aksiyalarining 9 foizini har bir aksiya uchun 13,2 yevro narxda sotib oldi. Kelganning umumiy qiymati 702 million yevroni tashkil etdi. Aksiyalarning 4,5 foizlik ulushi Germaniya hukumatidan, qolgan 4,5 foizi esa birjadan sotib olingan[15][16].

Commerzbank brand

Commerzbankning Leypsig shahridagi boʻlimining ichki koʻrinishi (2017-yil)
Frankfurt shahridagi Dresdner Bankka tegishli boʻlgan eski „Gallileo“ osmonoʻpar binosida logotipning yangilanishi(2010)
Commerzbank Arena stadionining tashqi koʻrinishi

Commerzbankning dastlabki logotiplarida CDB va CPB qisqartmalari aks etgan edi. 1920-yillardan boshlab ushbu qisqartmalar kompaniya qiyofasiga kiritildi. 1940-yilda „C“ harfi va Merkuriy qanotlari tasvirlangan logotip joriy etildi. 1972-yilda uning ortidan kompas guli (shamollar guli) shaklidan ilhomlanib yaratilgan „Quatre Vents“ (Toʻrt shamol) logotipi paydo boʻldi[17]. 2009-yilda Dresdner Bank sotib olinganidan keyin, Commerzbank yangi shriftda yozilgan nom, sariq rang va uch oʻlchamli (3D) lenta tasviri tushirilgan yangi logotipini taqdim etdi. Commerzbank Parij kelishuvi doirasida global isishni 2 °C dan pastroq darajada cheklash maqsadini qoʻllab-quvvatlaydi va 2006-yildan beri BMT Global shartnomasi, shuningdek, Masʼuliyatli bank faoliyati prinsiplari aʼzosi hisoblanadi. 1980-yillardan qayta tiklanadigan energiya loyihalarini moliyalashtirib kelayotgan bank, 2026-yil may holatiga koʻra 2,85 milliard yevrolik „yashil obligatsiyalar“ chiqargan. Batafsil maʼlumotni Commerzbank’ning rasmiy barqarorlik hisobotlaridan topishingiz mumkin.

Yana qarang

Tashqi havolalar

Vikiomborda „Commerzbank“ mavzusi boʻyicha mediafayllar bor.


Manbalar

  1. ↑ Breinich-Schilly, Angelika. „Commerzbank schärft Fokus auf Mittelstand und Vermögende“ (de). Springer Professional (2022-yil 9-noyabr). Qaraldi: 2026-yil 13-may.
  2. ↑ Eine Frage der Perspektive (de) (2011-yil 30-may), s. 16.
  3. ↑ Commerzbank: Schöne neue gelbe Welt (de) (2010-yil 16-iyun), s. 37.
  4. ↑ Zwei zu eins: Die Commerzbank zieht einen Schlussstrich – abgeschlossen ist die Integration der Dresdner aber nicht. (de) (2011-yil 28-may), s. 18.
  5. ↑ Hirschbiegel, Thomas. „Hamburg - Commerzbank-Zentrale droht der Abriss: Und wieder stirbt ein Stück Stadt-Geschichte“ (de). Focus Online (2019-yil 1-mart). Qaraldi: 2026-yil 13-may.
  6. ↑ Cominvest landet bei Allianz (de) (2009-yil 14-yanvar), s. 3.
  7. ↑ Studieren geht über Sanieren (de) (2011-yil 24-fevral), s. 1.
  8. ↑ Eurohypo vervierfacht Verlust (de) (2011-yil 11-avgust), s. 3.
  9. ↑ „Debatte über Verkauf der Anteile des Bundes an der Commerzbank“ (de). Bundestag (2024-yil 26-sentyabr). Qaraldi: 2026-yil 23-may.
  10. ↑ „Staatsbeteiligung nach Finanzkrise: Bund verkauft Commerzbank-Anteile – doch zu welchem Preis?“ (de) (2024-yil 25-sentyabr). Qaraldi: 2026-yil 23-may.
  11. ↑ „Commerzbank AG“ (de). Lobbyregister des Deutschen Bundestages (Lobbying Register of the German Bundestag). Deutscher Bundestag. Qaraldi: 2026-yil 25-may.
  12. ↑ Kröner, Andreas. „Überraschender Wechsel: Jens Weidmann soll neuer Commerzbank-Aufsichtsratschef werden“ (de) (2022-yil 19-noyabr). Qaraldi: 2026-yil 23-may.
  13. ↑ KfW und Commerzbank vereinbaren Globaldarlehen. Volumen von 500 Mill. Euro wie bei IKB-Vertrag (de) (2002-yil 19-iyul), s. 17.
  14. ↑ „Kreditversorgung: Commerzbank und KfW legen Mittelstandsfonds auf“ (de) (2010-yil 27-may). Qaraldi: 2026-yil 24-may.
  15. ↑ Ahlers, Martin. Commerzbank stellt auf digitale Beratung um (de) (2023-yil 30-mart), s. 19.
  16. ↑ Commerzbank bietet kostenloses Girokonto (de) (2006-yil 8-dekabr), s. 23.
  17. ↑ Dentz, Markus; Reifenberger, Sabine. „Commerzbank passt M&A- und ECM-Angebot an“ (de) (2021-yil 4-fevral). Qaraldi: 2026-yil 24-may. 
"https://ziyosfera.uz/index.php?title=Commerzbank&oldid=1000293" dan olindi