Bichilish

Bichilish — badanning tabiiy burmalaridagi terining ishqalanib qizarishi hisoblanadi. Asosan, dumba burmalari, chov, oyoq barmoqlarining orasi, qoʻltiq osti, ayollarda sut bezlarining osti bichilishi kuzatiladi. Koʻp terlash va koʻp yogʻ chiqib turishi, oqchil kelishi siydik tuta olmaslik bichilishga sabab boʻladi. Bichilish yilning issiq paytlarida koʻproq kuzatiladi. Bichilish asosan chaqaloqlarda, semiz kishilarda, qand kasalligi bilan ogʻriganlarda koʻp uchraydi. Bichilgan joy yalligʻlanib qichishadi, qizarib, pilchillab turadi, teri burmalari ostida yoriqlar paydo boʻladi. Baʼzan, yiringli yoki zamburugʻli kasalliklar qoʻshilishi ham mumkin. Bichilishning oldini olish uchun terini toza tutish, ozodalik qoidalariga rioya etish, chaqaloqlarni toʻgʻri parvarish qilish, koʻp terlashga qarshi choralar koʻrish lozim. Chaqaloqlar choʻmiltirilganidan va semiz kishilar yuvinganidan keyin teri burmalariga qizdirilgan oʻsimlik moyi surtish yoki upa (talk) sepib qoʻyish kerak.

Adabiyotlar

• OʻzME. Birinchi jild. Toshkent, 2000-yil