Bangilik

Bangilik — giyohvandlikka qaramlikning bir turi. Nashani tamakiga aralashtirib chekish, shuningdek isteʼmol qilish kiradi. Nasha kishini mast, kayfini chogʻ qiladi, vujudini boʻshashtiradi, vaqtinchalik sarhushtlik beradi ammo uni muntazam isteʼmol qilganda oʻtkir yoki surunkali zaharlanish alomatlari kuzatiladi. Oʻtkir zaharlanganda kishi jazavaga tushib, besabab kuladi, baʼzan yigʻlaydi. Asablari taranglashadi. Surunkalisida bangining xulqi oʻzgarib, feʼl-atvori ayniydi, jahldor boʻlib qoladi vas-vasaga tushadi, aqliy salohiyati susayadi. Bangi narkotik moddadan mahrum boʻlsa, xumor (abstinent) sindrom deb ataluvchi kasallik holati roʻy beradi. Bangilikda ichki aʼzolar zararlanadi, asabiy — ruhiy oʻzgarishlar paydo boʻladi, insoniy fazilatlar barham topadi. Bangilikni davolash uchun ularga nasha bermay, maʼlum muddat (3 — 7 kun) ajratib qoʻyiladi va shu vaqt ichida xumorlik oʻtib ketishi kutiladi. Keyin organizmni mustahkamlash choralari (doridarmon bilan) koʻriladi, ruhiy va mehnat bilan davolash buyuriladi. Aholi oʻrtasida bangilikning zararini tushuntirish, yoshlar orasida ogohlantirishlar oʻtkazish uning oldini olishda muhim ahamiyatga ega.