Aygʻir

Aygʻir – voyaga yetgan ot. Aygʻir biyadan koʻra sekinroq oʻsib, kechroq voyaga yetadi. Aygʻirning qarchigʻayi biyanikiga nisbatan 2–3 sm baland, vazni ogʻir, oyoqlari uzun va pishiq, kallasi katta, gavdasi ixchamroq. Nasldor Aygʻirlar yilqining sifatini yaxshilashda katta ahamiyatga ega. Naslchilik ishlari uchun Aygʻir tanlashda ularning ishchanligi (chopish yoki yuk tortish qobiliyati), jinsiy faolligi, tana tuzilishi va ajdodining sifatlari e’tiborga olinadi. Agar biror Aygʻirdan bola olingan boʻlsa, oʻsha Aygʻir naslining sifatiga qarab ham baholanadi. Koʻpchilik Aygʻirlardan naslchilik ishlarida gʻunanligidan boshlab foydalaniladi. Aygʻir bir mavsumda uyurga qoʻyish usuli qoʻllanganda 25 biyani, qoʻlda qochirish usuli qoʻllanganda 50 biyani qochiradi. Sun’iy urugʻlantirish usuli qoʻllanganda, har bir Aygʻirning mavsumda bergan pushti 500 biyani qochirishga yetadi.

Adabiyotlar

• OʻzME. Birinchi jild. Toshkent, 2000-yil