Ataraksiya

Ataraksiya (yun. ataraxia – xotirjamlik) – yunon etikasida ruhiy osoyishtalik, xotirjamlikni bildiruvchi tushuncha. Demokrit ta’limotida Ataraksiya hayot tashvishlaridan, oʻlim, qoʻrquv va har qanday ruhiy hayajondan xoli boʻlgan, kishida ehtiroslar ustidan aql hukmronlik qiladigan holatni anglatadi. Ataraksiyaga oid gʻoyalar keyinchalik Epikurning axloqiy ta’limotida rivoj topdi. Uning fikricha, Ataraksiya hayotning eng oliy ideali boʻlgan donishmand shaxsning ichki va botiniy erkinlik holatidir. U hayot quvonchlaridan lazzatlanishga va huzur qilib orom olishga undaydi. Skeptiklar (masalan, Pirron) fikricha, inson baxti – hayot voqealariga beparvo qarash, xotirjam hayot kechirishga oʻrganishdir. Tibbiyotda Ataraksiya bemorning xotirjam, tinch va bezovta boʻlmasdan dam oladigan holatini ifodalaydi. Shu sababli shifokorlar unga muolajaning ma’lum qismi sifatida ham qaraydilar.

Adabiyotlar

• OʻzME. Birinchi jild. Toshkent, 2000-yil