Askaridoz

Askaridoz — toʻgarak chuvalchanglar (askaridalar) tipiga mansub parazitlar keltirib chiqaradigan gijja kasalligi. Askaridalar ancha yirik boʻlib, odamning ingichka ichagida parazitlik qiladi. Asosan bolalarda koʻproq uchraydi. Bemor askaridoz tarqatuvchi manba hisoblanadi. Kasallik askarida tuxumlari bilan ifloslangan sabzavo-mevalar, qaynatilmagan suv, kir qoʻl orqali yuqadi.

Belgilari

Kasallikning ilk davrida kasallik koʻpincha umumiy alomatlar bilan kechadi: darmonsizlik, yoʻtal, harorat koʻtarilishi, eshakyemi toshishi kabi allergik holatlar kuzatilishi mumkin. Keyinchalik bosh aylanishi, bosh ogʻrigʻi, meʼda-ichak faoliyatining buzilishi (koʻngil aynishi, qusish, koʻp soʻlak oqishi), oʻta toliquvchanlik, kechasi qoʻrqish alomatlari namoyon boʻladi. Bolalar uyquda tishini gʻijirlatish asosiy belgilaridan biri. Bemorlarda kamqonlik, vitamin yetishmasligi, asabiylashish va boshqa shu kabi holatlar kuzatiladi. Askaridalarning oʻt yoki meʼda-ichak yoʻllariga kirishi natijasida yiringli xolesistit, jigar abssessi, peritonit, sepsis, oʻtkir pankreatit, appenditsit, ichak tutilishi va boshqa turli asoratlar yuzaga kelishi mumkin. Askaridozga davo vrach nazorati ostida amalga oshiriladi. Kasallikning oldini olish uchun ozodalik va sarishtalikka hamda gigiyena qoidalariga amal qilish, meva-sabzavotlarni yuvib isteʼmol qilish lozim.

Havolalar

• http://referat.arxiv.uz (Wayback Machine saytida 2019-11-28 sanasida arxivlangan)
• Askaridoz (Wayback Machine saytida 2011-09-26 sanasida arxivlangan)
• Askaridoz (forumi) (Wayback Machine saytida 2013-07-14 sanasida arxivlangan)
• Askaridoz (Ascaridosis) (Wayback Machine saytida 2008-09-17 sanasida arxivlangan)