Arxangelsk

Arxangelsk — shahar (1613-yilgacha Novoxolmogori), Rossiya Federatsiyasi Arxangelsk viloyati markazi. Arxangelsk Rossiyadagi eng yirik dengiz va daryo portlaridan biri. Aholisi 410 mingdan ziyod (1999). Yirik temir yoʻl tuguni. Arxangelskning asosiy qismi Shimoliy Dvina daryosining sohillarida va deltasidagi orollarda joylashgan. Arxangelsk 1584-yilda bunyod etilgan, 1613-yildan arxangelsk deb atalgan. 1898-yilda arxangelsk bilan Moskva orasida temir yoʻl qurilgan. Arxangelsk oʻrmon sanoati boʻyicha va yogʻoch-taxta eksport qilishda Rossiyada eng yirik shahar, unda oʻnlab taxta tilish, sellyuloza-qogʻoz kombinatlari, gidroliz kukuni zavodi bor. Kemasozlik va kema tuzatish sanoati rivojlangan. Mexanika zavodi, qurilish materiallari, oziq-ovqat sanoati korxonalari va boshqa mavjud. Arxangelskda 3 oliy oʻquv yurti, 3 teatr, 2 muzey bor.

Adabiyotlar

• OʻzME. Birinchi jild. Toshkent, 2000-yil