Antalkid sulhi
Antalkid sulhi, Shohona sulh (miloddan avvalgi 386-yil) — miloddan avvalgi 395-387 yillardagi Korinf urushidan soʻng Sarda shahrida Sparta bilan Afina va Fiva boshchiligidagi yunon polislari oʻrtasida imzolangan. Sparta elchilari rahbari Antalkid nomidan olingan. Antalkid sulhi shartlarini amalda yunonlarga Eron davlati qoʻygan. Eron dastlab Spartaga qarshi, soʻngra Sparta bilan birga Afinaga qarshi urushgan. Eron tarkibiga Kichik Osiyodagi yunon shaharlari, Kipr oroli va Klazomena qoʻshib olingan, yunon polislariga muxtoriyat berilgan, faqat Lemnos, Imbros va Skirosgina Afina qoʻl ostida qoldirilgan, barcha siyosiy ittifoqlar (Peloponnes ittifoqidan boshqa) tarkatib yuborilgan. Antalkid sulhi Spartaning Yunonistondagi hukmronlik mavqeini oshirgan. Yunoniston yunon-fors urushlari (miloddan avvalgi 500—449-yillar) davrida erishgan yutuqlaridan mahrum boʻlgan, mamlakatda siyosiy tarqoqlik, oʻzaro nizolar kuchaygan.
Adabiyotlar
- OʻzME. Birinchi jild. Toshkent, 2000-yil
 | Ushbu maqolada Oʻzbekiston milliy ensiklopediyasi (2000-2005) maʼlumotlaridan foydalanilgan. |
 | Ushbu maqola chaladir. Siz uni boyitib, ZiyoSferaga yordam berishingiz mumkin. Bu andozani aniqrogʻiga almashtirish kerak. |