Angor echkisi

Angor echkisi — echkining qimmatli serjun zoti. Angor echkisining vatani Turkmanistonning gʻarbi. Turkmanlarning bir qismi XIII asrda bu yerdan Kichik Osiyoga koʻchib borgan va natijada hozirgi Turkiyaning Angora (Anqara) viloyati Angor echkisini urchitish markaziga aylangan. Bu zotning Angor echkisi deb atalishi ham shundan kelib chiqqan. XIX asrdan AQSH, Afrikadagi ayrim mamlakatlar, Avstraliyada boqiladi. Angor echkisining juni mayin, oq, tovlanuvchan, gʻoyat egiluvchan va pishiq (uzunligi 18-25 santimetr). Takalari oʻrta hisobda 50-55 kilogramm keladi, yiliga 5-7 kilogramm jun beradi, urgʻochilari 32-36 kilogrammga boradi, 3,1 kilogramm jun beradi. 65-70% toza jun chiqadi. Har yuz bosh Angor echkisidan yiliga 105 uloq olinadi. Sogʻin echkidan 70-100 kilogramm sut sogʻib olish mumkin, yogʻlik darajasi 4,2-4,4%. Oʻzbekiston (Pop tumani)ga 1936-yilda AQShning Texas va Nyu-Meksika shtatlaridan keltirilgan Angor echkisi ni jaydari echkilar bilan chatishtirib serjun echki zoti yaratildi (1962). Angor echkisi Oʻzbekistonda, asosan Namangan, Andijon viloyatlarida boqiladi.

Adabiyotlar

• OʻzME. Birinchi jild. Toshkent, 2000-yil