Angob

Angob — qizil kesakdan tayyorlangan boʻyoq. Angob kulolchilikda keng qoʻllanadi. Sopol idishlar va buyumlar Angob surtishdan oldin quritiladi. Notekis joylari maxsus loy (dazmol loy) bilan tekislanadi, soʻng hoʻl latta bilan silliqlanadi. Baʼzan Angob bir necha qavat surtiladi. Idishlar va buyumlar Angobdan keyin naqshlanadi. Oʻrta Osiyo xalqlari Angobni neolit davri (miloddan avvalgi IV — III ming yillik)dan boshlab sopol idishlarga naqsh berishda va boʻyashda ishlatgan. Kushon podsholigi (miloddan avvalgi II— I va milodiy I— IV asrlar) davridagi sopol idishlarning sirti Angob bilan boʻyalgan. Bunday idishlar Oʻrta Osiyoda qoraxoniylar davri (XI — XII asrlar)da ham keng tarqalgan. Angobdan qadimgi qabilalar oʻliklarni koʻmishda ham foydalangan. Koʻpincha murdaga Angob surtib yoki sepib koʻmilgan. Qadimgi odamlar gʻorlarning devorlariga va qoyatoshlarga Angob bilan rasmlar chizgan. Surxondaryo viloyati Sherobod tumanidagi Zarautsoydan 1936-yilda G. V. Parfenov topgan qadimgi rasmlar (hayvonlar shakllari) ham Angob bilan chizilgan.

Adabiyotlar

• OʻzME. Birinchi jild. Toshkent, 2000-yil