Anders Frandsen
Anders Frandsen | |
|---|---|
| Tavalludi |
8-dekabr 1960-yil Kopengagen, Daniya |
| Vafoti |
1-yanvar 2012-yil (51 yoshda) Hellerup, Daniya |
| Kasbi |
|
Anders Frandsen (1960-yil 8-dekabr — taxminan 2012-yil 1-yanvar) — daniyalik musiqachi, xonanda, aktyor va teleboshlovchi. U Kopengagen shahrida tugʻilgan[1].
Karyerasi
Frandsen professional aktyorlik taʼlimini olmagan boʻlsa-da, 1980-yillarda teatr sahnalarida chiqish qilgan. Keyinchalik u Camilla Miehe-Renard bilan birgalikda Daniyaning Kanal 2 telekanalida boshlovchi sifatida faoliyat yuritgan.
U 1991-yilda bastakor Michael Elo tomonidan yozilgan “Lige der hvor hjertet slår” qoʻshigʻi bilan „Dansk Melodi Grand Prix“ tanlovida gʻolib chiqib mashhurlikka erishgan. Shundan soʻng u Italiyaning Rim shahrida oʻtkazilgan "Eurovision-1991" tanlovida Daniya sharafini himoya qilgan. Qoʻshiq tanlovda muvaffaqiyat qozona olmay, atigi 8 ball bilan 19-oʻrinni egallagan. Biroq bu natija uning mashhurligiga salbiy taʼsir koʻrsatmagan va keyingi yili Daniya milliy finalining boshlovchisi sifatida faoliyat yuritgan.
Shundan soʻng u bir necha yil davomida TV3 telekanalida boshlovchi boʻlib ishlagan. U “Knald eller Fald” (tanishuv dasturi), “Stjerneskud” (oʻxshash qiyofali ishtirokchilar isteʼdodlar tanlovi) kabi koʻplab koʻrsatuvlarda qatnashgan, shuningdek telekanalning ertalabki dasturlarini ham olib borgan. 1997-yildan boshlab esa u asta-sekin televideniyeda kamroq ko'rinish bera boshlagan.
2001-yilda u „Daniya Melodi Grand Prix“ finalida ishtirok etib, tanlov qoʻshiqlaridan birini taqdim etgan. Shuningdek, 2004-yilda daniyalik “Ørnen” teleserialining bir qismida mehmon aktyor sifatida ko‘rish bergan. 2005-yilda esa TV2 Charlie kanalidagi “Twist & Shout” ko‘rsatuvining bir sonida mehmon sifatida qatnashgan.
Vafoti
2012-yil 1-yanvar kuni kechqurun Frandsenning doʻstlari uni Hellerupdagi xonadonida jonsiz holda topgan. Ular zudlik bilan tez yordam xizmatini chaqirishgan, biroq tibbiyot xodimlari voqea joyining oʻzida uning vafot etganini tasdiqlashgan[1].
Frandsen bogʻ uchun moʻljallangan mangalni yotoqxonasiga olib kirib yoqqan, natijada uglerod oksidi (is gazi)dan zaharlanish oqibatida vafot etgan. Shuningdek, voqea joyidan xayrlashuv maktubi ham topilgan, biroq uning aniq qachon vafot etgani maʼlum emas. Frandsen vafot etganida 51 yoshda edi[2][3].
Manbalar
- ↑ 1,0 1,1 Hansen, Jens. „Venner fandt Anders Frandsen død“ (da). B.T. (2012-yil 3-yanvar).
- ↑ „Ekskæresten: Frandsen var meget pigeglad“ (da-DK). avisen.dk. Qaraldi: 2015-yil 23-noyabr.
- ↑ „Anders Frandsen: Skrev afskedsbrev“. SE og HØR. Qaraldi: 2015-yil 23-noyabr.