Andava

Andava (fors-toj. andova, ando — somonli loy suvash) — suvoq ishlarida suvalayotgan sathni tekislash, silliqlash, rax chiqarish uchun ishlatiladigan quruvchilik asbobi. Asosan temirdan (baʼzan, taxtadan) uzunligi 30 — 40 sm, eni 8 —10 sm, qalinligi 2 mm, uch tomoni ensizroq qilib yasaladi. Yarim yey shaklidagi dastasi boʻladi. Bundan tashqari, tunuka qoplangan katta Andava, katta silliqlash Andavasi, namat qoplangan dyuralyuminiyli kichik Andava, tashqi qirra Andavasi, ichki qirra Andavasi, rusta chiqargich Andava, kurakcha Andava (masterok), galtel Andavasi (yarim dumaloq Andava) kabi xillari bor. Katta yuzalarni umumiy silliqlashda gazchoʻp (katta yogʻoch Andava)dan foydalaniladi.

Adabiyotlar

• OʻzME. Birinchi jild. Toshkent, 2000-yil