Alouddin Xalji

Alouddin Xalji, Alouddin Muhammadshoh I — Dehli sultonligi hukmdori (1296—1316). Amakisi Jaloliddin Xaljiyni xiyonatkorona oʻldirib taxtni egallagan. Saltanatni mustahkamlab, hududini kengaytirgan. Yagona maʼmuriy tizimni joriy qilgan, soliqlarni tartibga solgan. Musulmon ruhoniylarining davlat ishlariga aralashuviga chek qoʻygan. Iqtodorlar va musulmonlar muassasalari (inomlar va vaqflar) davlat xazinasi foydasiga musodara qilingan, yerlardan olinadigan soliq miqdori ancha oshirilgan. Allouddin Xaljiy davrida dehqonlardan olinadigan natural soliqlar miqdori hosilning yarmigacha oshirilgan. Allouddin Xaljiy ulkan qoʻshin tuzgan, moʻgʻullar saltanatning shimoli-gʻarbiy chegaralariga qilgan bosqinlarini bir necha marta (1303—1308) qaytargan. Oʻz navbatida Janubiy Hindistonda zafarli urushlar olib borgan (1306—1313-yillardagi Dekan yurishlari). Allouddin Xaljiy Ashoka davridan soʻng birinchi boʻlib butun Hindiston hududini oʻz ichiga olgan yagona davlat tuzishga erishgan.