Alisher Doniyorov
| Alisher Doniyorov | |
|---|---|
| Tavalludi |
30-iyun 1966-yil Qarshi tumani, Qashqadaryo viloyati, Oʻzbekiston SSR, SSSR |
| Fuqaroligi |
 SSSR→ Oʻzbekiston |
| Millati | oʻzbek |
| Mukofotlari | „Oʻzbekiston mustaqilligining 10 yilligi“, „Shuhrat“ medali |
Alisher Doniyorov (1966-yil 30-iyun, Qarshi tumani, Qashqadaryo viloyati, OʻzSSR) – oʻzbekistonlik olim, tarixshunos, tarix fanlari doktori, professor[1]. „Oʻzbekiston mustaqilligining 10 yilligi“, „Shuhrat“ medali bilan mukofotlangan.
Hayoti
Alisher Doniyorov 1966-yil 30-iyun kuni Oʻzbekiston SSR tarkibidagi Qashqadaryo viloyatining Qarshi tumanida tugʻilgan. Tumandagi oʻrta maktabda tahsil olgach, 1979-yil Toshkent davlat universitetining tarix fakultetiga oʻqishga qabul qilinadi. Oliygohni 1983-yilda muvaffaqiyatli tamomlaydi. 1984-yilda Toshkent davlat universitetining ijtimoiy fanlar oʻqituvchilari malakasini oshirish institutida komendant, yotoqxona rahbari lavozimlarida ishladi. 1986-yilda Toshkent shahridagi 14-65-maktablarda tarix fanidan dars bergan. 1986-yildan 1997-yilgacha „Oʻzbekiston“ telekanalida muxbir, katta muharrir lavozimlarida ishlab, „Oila“, „Oʻzingni zoʻr bilsang“ hamda „Xalqaro faoliyat“ koʻrsatuvlarini maullifligida suratga olgan.
Faoliyati
1989-yili Toshkent davlat universiteti tarix fakultetini muvaffaqiyatli tamomlagach, „Etnografiya, qadimgi dunyo va oʻrta asrlar tarixi“ kafedrasida oʻqituvchilik qilib faoliyatini davom ettirdi. 1994-yildan 1997-yilgacha Toshkent davlat universitetining tarix fakultetiga aspirantura taʼlim bosqichida tahsil oldi. 1997-yili Oʻzbekiston Respublika Fanlar akademiyasining tarix institutida „Oʻzbekistonda etnografik bilimlarning rivojlanishi:asosiy yoʻnalishlar va natijalar“ mavzusida nomzodlik dissertatsiyasini himoya qildi. 2003-yilda „Oʻzbekiston XX asrda etnografik tadqiqotlar:asosiy bosqichlar, muammolari va rivojlanish bosqichlari“ mavzusida doktorlik dissertatsiyasini himoya qilgan. 1997-yildan 1999-yilgacha Toshkent davlat sharqshunoslik institutida „Markaziy Osiyo xalqlari tarixi“ kafedrasida katta oʻqituvchi sifatida ishlagan. 2004-yildan 2009-yilgacha Toshkent davlat sharqshunoslik institutining „Markaziy Osiyo xalqlari tarixi“ kafedrasida oʻrindoshlik asosida professor sifatida faoliyati davom ettirgan. Olim Toshkent davlat sharqshunoslik institutida ilmiy izlanishlar natijasida bir qancha ilmiy qoʻllanmalar va fan darsliklarini ishlab chiqqan[2][3]. Shu yoʻnalishda tahsil oluvchi oliy taʼlim muassasalaridagi talabalar uchun, „Etnografiya asoslari“, „Markaziy Osiyo xalqlari etnografiyasi, etnogenezi va etnik tarixi“, „Sharq mamlakatlari etnografiyasi“, „Etnografiya tilshunosligi“ qoʻllanmalarini yaratdi. Taniqli etnograf olim, professor Karim Shoniyozov faoliyatini tahlil qilib, „Akademik Karim Shoniyozov oʻqishlari“ mavzusida ilmiy-amaliy konferensiyalarda maʼruzalari bilan ishtirok etgan. Ilmiy jurnallarda 100 dan ortiq maqolalari nashr etilgan. Etnik tarixshunoslik, etnologiya sohasida uning ilmiy rahbarligida 9 nafar fan nomzodlari, 1 ta fan doktori oʻzlarining ilmiy dissertatsiyalarini himoya qilgan.
Mukofotlari
Olimning ilmiy izlanishlari hamda ilmiy faoliyati sabab bir qancha davlat mukofotlari bilan mukofotlangan. 2001-yilda Oʻzbekiston Respublikasi Prezidentining tegishli farmoniga muvofiq, „Oʻzbekiston mustaqilligining 10 yilligi“ esdalik nishoni bilan taqdirlangan. 2006-yilda esa „Shuhrat“ medali bilan mukofotlangan.
Havolalar
Manbalar
- ↑ O'zbekiston tarixchilari. Toshkent: "Fan va texnologiyalar" nashriyoti, 2012 — 81-bet.
- ↑ „“Markaziy Osiyo xalqlari tarixi (Yangi va eng yangi davr)” nomli kitobi nashr qilindi.“. TDSHU-Toshkent davlat sharqshunoslik universiteti rasmiy veb-sayti.
- ↑ „Doniyorov Alisher Toshkent davlat sharqshunoslik instituti Markaziy Osiyo xalqlari tarixi va manbashunoslik fakulteti professori“. https://tdshi.academia.edu/.