Abduvohid Hasanov
| Абдувахид Хасанов | |
|---|---|
| Fayl:Хасанов Абдувахид.jpg | |
| Tojikiston kompartiyasi Stalinobod shahar komitetining birinchi sekretari | |
|
Mansab davri 1954 – 1961 | |
| Shaxsiy maʼlumotlari | |
| Tavalludi |
1920 Xoʻjand uyezdi, Samarqand viloyati (Rossiya imperiyasi), Turkiston ASSR, RSFSR |
| Vafoti | 1970 |
| Siyosiy partiyasi | KPSS |
| Mukofotlari |
  |
Abduvohid Hasanov (1920—1970) — sovet xoʻjalik, davlat va siyosat arbobi.
Biografiyasi
U 1920-yili Xoʻjand uyezdining Pilchukur qishlogʻida tugʻilgan. Hunarmand ishchining oʻgʻli boʻlib, yoshligida oziq-ovqat yetishmovchiligidan onasi vafot etgan. Shu sababli 14 yoshidan boshlab faqat oʻzini va oilasini boqish uchun toʻquvchilik bilan shugʻullanib, mehnat faoliyatini boshlagan. 1934-yildan 1941-yilgacha Leninoboddagi „Qizil toʻquvchi“ ipakchilik fabrikasida oddiy ishchi boʻlib ishlagan. Ish bilan birga maktabda oʻqib, komsomol safiga kirgan va keyinchalik fabrika kadrlar boʻlimi boshligʻi etib tayinlangan. „Peredovik shyolka“ gazetasining mas’ul kotibi boʻlgan. 1941-yildan 1944-yilgacha rahbar komsomol ishida ishlagan (Tojikiston LKSM Markaziy Qoʻmitasining ipak kombinatidagi komsorgi, Tojikiston LKSM Leninobod shahar qoʻmitasining birinchi kotibi, Tojikiston LKSM Leninobod viloyat qoʻmitasining harbiy-jismoniy tarbiya ishlari boʻyicha kotibi). 1943-yilda KPSS aʼzoligiga qabul qilingan. 1944-yildan 1947-yilgacha rahbar partiya ishida ishlagan (Tojikiston Kompartiyasi Leninobod viloyat qoʻmitasi tashkiliy-yoʻriqchilik boʻlimi instruktori, Leninobod ipak kombinati partiya byurosi kotibi). U 1949-yilda Tojikiston Kompartiyasi Markaziy Qoʻmitasi huzuridagi ikki yillik respublika partiya maktabini tamomlagan. 1952-yili Leninobod shahridagi Davlat pedagogika institutining sirtqi boʻlimini bitirgan. 1960—1961-oʻquv yilida Moskva shahridagi KPSS Markaziy Qoʻmitasi huzuridagi Oliy partiya maktabida muvaffaqiyatli tahsil olgan. 1949-yildan 1950-yil avgust oyigacha Tojikiston Kompartiyasi Markaziy Qoʻmitasi sanoat boʻlimi mudirining oʻrinbosari, soʻngra boʻlim mudiri lavozimlarida ishlagan. 1950-yil avgustidan 1954-yilgacha Stalinobod shahar partiya qoʻmitasi byurosi aʼzosi va ikkinchi kotibi etib saylangan. U 1954—1960-yillarda Tojikiston Kompartiyasi Dushanbe shahar qoʻmitasining birinchi kotibi lavozimida ishlagan. Vatan uning kamtarona mehnatini yuksak baholab, „Lenin“, „Mehnat Qizil Bayroq“, „Hurmat Belgisi“ ordenlari hamda „1941—1945-yillardagi Ulugʻ Vatan urushida koʻrsatgan jasoratli mehnati uchun“ medali bilan taqdirlagan. Tojikiston SSR Oliy Soveti Prezidiumi tomonidan „Faxriy yorliq“ bilan mukofotlangan. Tojikiston SSR Oliy Soveti deputati, shuningdek, Tojikiston Kompartiyasi Markaziy Qoʻmitasi byurosi aʼzosi etib saylangan.1961-yilda Dushanbe qurilish materiallari kombinatiga xoʻjalik ishlariga yuborilgan. 1970-yilda vafot etgan[1].