Maʼnaviyat va maʼrifat markazi

Oʻzbekiston Respublikasi Ma’naviyat va Ma’rifat markazi

Turi	Davlat boshqaruv idorasi
Maqomi	Amalda
Ishga tushgan sanasi	23-aprel, 1994-yil (1994-04-23)
Joylashuvi	Toshkent shahri, Yakkasaroy tumani, Yusuf Xos Hojib koʻchasi, 76-uy.
Direktori	Otabek Abdurashidovich Hasanov
Vebsayti	manaviyat.uz

Oʻzbekiston Respublikasi Maʼnaviyat va maʼrifat markazi – respublika madaniy-maʼrifat ishlarini olib boruvchi jamoatchilik tashkiloti. 1994-yil 23-aprel Oʻzbekiston Respublikasi Prezidentining "Respublika „Maʼnaviyat va maʼrifat“ jamoatchilik markazini tashkil etish toʻgʻrisida"gi farmoniga binoan tuzilgan. Qoraqalpogʻiston Respublikasi, viloyatlar, Toshkent shahri, barcha shaharlar va tumanlarda uning boʻlimlari faoliyat yuritadi.

Keyinchalik, 2006-yil 25-avgustda Respublika Maʼnaviyat va maʼrifat kengashi asosida ikki alohida muassasa – Respublika Maʼnaviyat targʻiboti markazi hamda Milliy gʻoya va mafkura ilmiy-amaliy markazi faoliyat yurita boshlagan. 2017-yil 28-iyulda esa ushbu ikki markazning faoliyati birlashtirilib, Respublika Maʼnaviyat va maʼrifat markazi tashkil etilgan.

Keyinchalik markaz huzurida Maʼnaviyat va ijodni qoʻllab-quvvatlash jamgʻarmasi hamda Ijtimoiy-maʼnaviy tadqiqotlar instituti tashkil qilindi. Shuningdek, Oyina.uz maʼnaviy-maʼrifiy portali ishga tushirildi. Bugungi kunda Markaz O‘zbekiston Respublikasi Prezidenti raislik qiladigan Respublika Ma’naviyat va ma’rifat kengashining ijro organi hisoblanadi.

1999-yilda Maʼnaviyat va maʼrifat markazi ishiga bevosita rahbarlik qilish, uning ishlarini muvofiqlashtirish maqsadida Qoraqalpogʻiston Respublikasi, viloyatlar, Toshkent shahri, barcha shahar va tumanlarda boʻlimlari boʻlgan Respublika Maʼnaviyat va maʼrifat Kengashi tashkil qilindi. Uning asosiy shiori – „Jaholatga qarshi maʼrifat“. Oʻzbekiston Respublikasi Bosh vaziri oʻrinbosari Respublika Maʼnaviyat va maʼrifat Kengashining, Qoraqalpogʻiston Respublikasi Vazirlar Kengashi raisi, viloyat, shahar, tuman hokimlari joylardagi Maʼnaviyat va maʼrifat Kengashlarining raislari hisoblanadi. Kengash targʻibotchilar roʻyxatini tasdiqlaydi va ularni qoʻllanma va tavsiyalar bilan taʼminlaydi, shuningdek, markaz ishini tashkil etib, faoliyat yoʻnalishlarini belgilab beradi, ishlarini nazorat qiladi va boshqa Maʼnaviyat va maʼrifat markazlari hamda Kengashning asosiy vazifasi jamoatchilik ongiga istiqlol gʻoyalarini singdirish, uning mustaqil tafakkurini yuksaltirishga koʻmaklashish, ayniqsa, oʻsib kelayotgan yosh avlodda milliy mafkura va umumbashariy qadriyatlarga asoslangan dunyoqarashni shakllantirishdan iborat. Maʼnaviyat va maʼrifat Kengashining nashri sifatida Tafakkur, Jahon adabiyoti jurnallari chop etiladi; Maʼnaviyat nashriyoti, „Oltin meros“ xalqaro xayriya jamgʻarmasi kabi jamgʻarmalar ham faoliyat koʻrsatadi. Maʼnaviyat va maʼrifat markazi Respublika maʼnaviyat va maʼrifat Kengashi qarorlari va koʻrsatmalarini joylarda amalga oshiruvchi va targʻibot, tashviqot tadbirlarini uyushtiruvchi tashkiliy guruxga aylantirildi (1999) va uning tarkibida targʻibotchilarni muvofiqlashtirish tashkiliy boʻlimi, maʼnaviy-maʼrifiy targʻibot boʻlimi, ijtimoiy-iqtisodiy targʻibot boʻlimi, ijtimoiy-siyosiy, huquqiy targʻibot boʻlimi va boshqa boʻlimlar faoliyat olib boradi.

Faoliyat yoʻnalishlarining foizli taqsimoti

Markazning amaldagi strategik faoliyati quyidagi uch asosiy yoʻnalishga boʻlingan:

40% Maqsadli loyihalar

• Yangi milliy ruhiyatni shakllantirish
• Mintaqaviy yakdillikka erishish
• Jamiyat birdamligini taʼminlash
• Davlat mustaqilligini mustahkamlash

40% Raqamli targʻibot

• Ijtimoiy roliklar va kliplar
• Instagram, YouTube, Telegramdagi maqsadli profillar
• Bloger va vaynerlar bilan hamkorlik
• Milliy kontentlar yaratish

20% Anʼanaviy targʻibot

• Umumxalq bayramlari va milliy sanalarga oid tadbirlar
• „Kinokarvon“ loyihasi
• „Jaholatga qarshi maʼrifat“ tadbirlari
• „Maʼrifat ulashib“ loyihasi

Havolalar

• 🌐 Rasmiy vebsayt
• 📱 Telegram
• 📘 Facebook
• 📷 Instagram
• ▶️ YouTube