Kontent qismiga oʻtish

L'Oiseau et l'Enfant

ZiyoSfera, erkin ensiklopediya
„L'Oiseau et l'Enfant“
Marie Myriam singli
Tu te reconnaîtras albomidan
Chiqarilgan sanasi 1977-yil
Leybl Polydor
Qoʻshiq muallif(lar)i Miriam Lopes
Marie Myriam singllari xronologiyasi
„Un, deux, trois“ „L'Oiseau et l'Enfant“ „Il y aura toujours des violons“
Rasmiy ijro videosi
"L'Oiseau et l'Enfant" YouTubeda

„L’Oiseau et l’Enfant“ (fransuzcha talaffuzi: ​[lwazo e lɑ̃fɑ̃]; tarjimasi: „Qush va bola“) — fransuz xonandasi Marie Myriam tomonidan ijro etilgan qoʻshiq. Taronaning musiqasi Jean-Paul Cara, matni esa Joe Gracy tomonidan yozilgan. Qoʻshiq 1977-yilda Londonda boʻlib oʻtgan Eurovision qoʻshiq tanlovida Fransiya nomidan ishtirok etdi va mamlakatga tanlov tarixidagi hozirgacha boʻlgan soʻnggi gʻalabasini taqdim etdi.

Tarixi

Yaratilish tarixi

„L’Oiseau et l’Enfant“ qoʻshigʻi Jean-Paul Cara tomonidan bastalangan, fransuzcha matni esa, Joe Gracy tomonidan yozilgan. Qoʻshiqni esa Marie Myriam ijro etgan[1]. Marie Myriam ushbu taronani besh tilda kuylagan: fransuzcha, ingliz tilida „The Bird and the Child“, Joe Gracy hamda H. von Schenckendorf matni asosidagi nemis tilida „Der Vogel und das Mädchen“, ispan tilida „El zagal y el ave azul“, hamda oʻz ona tili hisoblangan portugal tilida „A ave e a infância“ nomlari ostida ijro etgan[2].

Eurovision

1977-yilning 20-fevral hamda 6-mart kunlari oraligʻida Marie Myriam „L’Oiseau et l’Enfant“ taronasi bilan milliy finalning 22-mavsumida ishtirok etdi. Ushbu tanlov bosqichi Eurovision qoʻshiq tanlovida Fransiya sharafini himoya qiladigan qoʻshiq va ijrochini aniqlash maqsadida „Télévision Française“ 1 (TF1) telekanali tomonidan tashkil etilgan edi. Musobaqada gʻalaba qozongan ushbu tarona tufayli Myriam Eurovisionda Fransiya sharafini himoya qilish huquqini qoʻlga kiritgan[3].

Qoʻshiq uchun targʻibot videosi ham tayyorlangan boʻlib, unda Marie Myriam Parijdagi Square René Viviani hududining ochiq havoda joylashgan qismida qoʻshiqni ijro etgani tasvirlangan. Ushbu targʻibot videosi, ayniqsa, tomoshabinlar orasida katta gavjumlik yuzaga kelgani va shu sabab jandarmlar olomonni tartibga solish hamda uni nazoratda ushlab turishga majbur boʻlgani tasvirlangan jihati bilan ajralib turadi. Hatto ayrim muxlislar qoʻshiqchini yaxshiroq koʻrish maqsadida Parijdagi „eng qadimgi daraxt“ deb ataladigan daraxtga ham chiqib olgan. Tanlov oqshomida u yerga tegib turadigan darajada uzun va zargʻaldoq rangdagi libosda, besh nafar yordamchi xonandasi esa qora kiyimda sahnaga chiqdi.

1969-yil 29-martda Londonning „Wembley Conference Centre“ majmuasida Eurovision qoʻshiq tanlovi boʻlib oʻtdi. Tanlov Britaniya Teleradiokompaniyasi (BBC) boshchiligida tashkil etildi hamda butun qitʼa boʻylab jonli efirda namoyish etildi. Myriam kechada Dream Express guruhining Belgiya nomidan ijro etgan „A Million in One, Two, Three“ qoʻshigʻidan soʻng, oʻn sakkizinchi va oxirgi boʻlib „L’Oiseau et l’Enfant“ kompozitsiyasini taqdim etdi. Fransiya nomidan qatnashgan ushbu ijroda jonli orkestrga Raymond Donnez dirijyorlik qildi[4].

Ovoz berish yakunlariga koʻra, u 136 ball toʻpladi va oʻn sakkizta ishtirokchi orasida birinchi oʻrinni egallab, tanlov gʻolibiga aylandi[5]. 1978-yilgi Eurovision qoʻshiq tanlovida Fransiya vakili sifatida Joël Prévost ijro etgan „Il y aura toujours des violons“ qoʻshigʻi ishtirok etdi.

Natijalar va keyingi voqealar

1981-yil 22-avgustda Mysen shahrida Eurovisionning 25 yilligiga bagʻishlab oʻtkazilgan „Songs of Europe“ yubiley shousida Marie Myriam „L’Oiseau et l’Enfant“ taronasini qayta ijro etdi[6].

Chartlardagi natijalari

Haftalik chartlar

Chartlar (1977) Eng yuqori oʻrni
Avstriya bayrogʻi Avstriya (Ö3 Austria Top 40)[7] 15
Belgiya bayrogʻi Belgiya (Ultratop 50 Flanders)[8] 6
Fransiya (IFOP)[9] 1
Niderlandlar bayrogʻi Niderlandiya (Single Top 100)[10] 23
Shvetsiya bayrogʻi Shvetsiya (Sverigetopplistan)[11] 5
Shveytsariya bayrogʻi Shveysariya (Schweizer Hitparade)[12] 2
Germaniya Gʻarbiy Germaniya (Official German Charts)[13] 19

Merosi

2016-yilda UNICEF tashabbusi doirasidagi Kids United loyihasi oʻzining „Tout le bonheur du monde“ nomli ikkinchi albomida ushbu qoʻshiqni qayta ijro etib kiritdi. Qoʻshiq 2016-yil avgust oyida SNEP yakkaliklar chartiga ham kiritilgan[14]. Qoʻshiqning kaver versiyasi 2021-yilda Kanadadagi IKEA reklamasida qoʻllanilgan[15].

Manbalar

  1. ↑ Mogui, Jean-Pierre. Victoire à Wembley (fr). Le Figaro (1977-yil 9-may), s. 30.
  2. ↑ „L'Oiseau et l'Enfant - lyrics“. The Diggiloo Thrush.
  3. ↑ „French Selection 1977“. Eurovisionworld.
  4. ↑ „Eurovision Song Contest 1977“. Eurovision Song Contest. 7 May 1977. BBC / EBU.
  5. ↑ „Official Eurovision Song Contest 1977 scoreboard“. Eurovision Song Contest.
  6. ↑ „Songs of Europe“. Eurovision Song Contest. 22 August 1981. NRK / EBU.
  7. ↑ "Marie Myriam – L'oiseau et l'enfant" (olmoncha). Ö3 Austria Top 40.
  8. ↑ "Marie Myriam – L'oiseau et l'enfant" (niderlandcha). Ultratop 50.
  9. ↑ „Tous les titres par artiste - M“. InfoDisc. Qaraldi: 2023-yil 20-fevral., sélectionnez " Marie MYRIAM " dans le menu et cliquez sur " OK ".
  10. ↑ "Marie Myriam – L'oiseau et l'enfant" (niderlandcha). Single Top 100.
  11. ↑ "Marie Myriam – L'oiseau et l'enfant". Singles Top 100.
  12. ↑ "Marie Myriam – L'oiseau et l'enfant". Swiss Singles Chart.
  13. ↑ "Offiziellecharts.de – Marie Myriam – L'oiseau et l'enfant". GfK Entertainment Charts. Qaraldi: 2019-yil 28-may.
  14. ↑ KIDS UNITED — L’OISEAU ET L’ENFANT page
  15. ↑ „IKEA aide à changer le monde un petit monde à la fois“. 
"https://ziyosfera.uz/index.php?title=L%27Oiseau_et_l%27Enfant&oldid=562047" dan olindi