Farogʻat Kamolova

Farogʻat Kamolova
Tavalludi	27-mart 1959-yil Moʻlkanlik qishlogʻi, Jizzax tumani, Jizzax viloyati, Oʻzbekiston SSR, SSSR
Vafoti	1-avgust 2022-yil(2022-08-01) (63 yoshda) Oʻzbekiston
Fuqaroligi	SSSR → Oʻzbekiston
Turmush oʻrtogʻi	Ahmad Aʼzam

Farogʻat Kamolova (1959-yil 27-mart Moʻlkanlik qishlogʻi, Jizzax tumani, Jizzax viloyati, Oʻzbekiston SSR, SSSR – 2022-yil 1-avgust Oʻzbekiston) — taniqli oʻzbekistonlik shoira. Adabiy tarjimon.

1981-yili Toshkent davlat universitetining (hozirgi OʻzMU) jurnalistika fakultetini tamomlagan. Gʻafur Gʻulom nomidagi adabiyot va sanʼat nashriyotida, „Gulxan“ jurnalida, „Yozuvchi“ nashriyotida faoliyat yuritgan.

1980-yillarda oʻsha davr yosh ijodkorlarining juda koʻpchiligini katta adabiyot maydoniga olib kirgan „Guliston“ jurnalida bosilgan shoira sheʼrlari sheʼriyat ixlosmandlari tomonidan qizgʻin olqishlanadi.

1985-yilda dastlabki sheʼriy toʻplami — „Osmon parchasi“ chop etildi. Shundan keyin shoiraning „Uzoq safarlar“ (1987), „Bargizub“ (1990), „Holatlar kitobi“ (2000) kabi sheʼriy toʻplamlari nashr qilingan.

Farogʻat Kamolovaning har bir satrida ona tabiatga, hayotga boʻlgan samimiy muhabbat ufurib turadi, uning sheʼrlaridagi tiniq tuygʻular, nekbin hayajonlar, eng avvalo, shoira yuragining hamisha, har qanday sharoitda ezgulik va mehru muhabbatga hamnafas yashab ijod qilganidan darak beradi. Shoiraning sheʼrlarida tungi yomgʻirlar shiviri, olislab ketayotgan bolalik turnalarining nolasi, bahor nabadasi silkitib turgan pardalar ortidagi yurakning goh koʻrinib, goh koʻrinmay turgan sirli manzaralari yashirin.

Shoira kitoblarining soni koʻp boʻlmasa-da, Farogʻat Kamolova oʻzbek sheʼriyatidagi oʻziga xos ovozga ega shoiralardan biri sifatida eʼtirof etiladi.

Serb shoirasi Desanka Maksimović, rumin adabiyoti vakillari Octavian Goga, Nichita Stănescu, Nicolae Labiş, George Bacovia, Mihai Eminescu, Zaharia Stancu, Nichita Stănescu, Ana Blandiana sheʼrlarini mahorat bilan oʻzbek tiliga tarjima qilgan.

2024-yilda Oʻzbekiston Yozuvchilar uyushmasida Farogʻat Kamolova va uning turmush oʻrtogʻi boʻlgan Ahmad Aʼzam xotirasiga bagʻishlangan xotira kechasi boʻlib oʻtgan.

Havolalar

• „Taniqli shoira Farogʻat Kamol vafot etdi“. oyina.uz (2022-yil 1-avgust). Qaraldi: 2025-yil 24-iyun.