Dilafroʻz Jabborova

Ziyosferada ismi Dilafroʻz va familiyasi Jabborova boʻlgan boshqa kishilar haqida ham maqolalar mavjud.

Dilafroʻz Abdurahimovna Jabborova (1950-yil, 7-may, Toshkent) – raqqosa. Oʻzbekiston xalq artisti (1984). Toshkent davlat milliy raqs va xoreografiya oliy maktabining xalq raqslari boʻlimini (1967), Toshkent davlat madaniyat institutining xoreografiya boʻlimini (1983) tugatgan.

„Shodlik“ ashula va raqs ansamblida (1967—1978), Navoiy teatrida (1978—1982), „Oʻzbekkonsert“ birlashmasida (1982—1986), 1986-yildan Muhitdin Qoriyoqubov nomidagi Oʻzbek davlat filarmoniya gastrol-konsert birlashmasida yakkaxon raqqosa. 1990— 2001-yillar „Shodlik“ (1996-yildan „Oʻzbekiston“) ashula va rake ansamblining badiiy rahbari. Ijrosidagi raqslar shoʻxchanligi, joʻshqin harakatlarga boy va ifodaviyligi, ayol qalbidagi ishq, dardu alam, quvonchlarni nozik ishvalarda ifoda etuvchi chiroyli xiromi bilan ajralib turadi.

Eng yaxshi raqslari: „Dil kuylasin“, „Gulruh“, „Daryoi azim“, „Surnay lazgisi“, „Noz etar“, „Oʻsma qoʻyibdi qoshiga“, „Raqqosa“, „Tanavor“, „Uynasangiz“, „Munojat“ va boshqalar. „Karmen“ (J. Bize) operasida Farandou partiyasini ijro etgan. Repertuaridan hind, chili, uygʻur, rus, eron, turk, afgʻon, loʻli va boshqa. Xalqlar raqslari oʻrin olgan. AQSH, Avstraliya, Belgiya, Vyetnam, Germaniya, Suriya, Gʻarbiy Berlin va boshqa mamlakatlarda gastrolda boʻlgan. D.Jabborova ijodiga bagʻishlangan „Dilafroʻz Jabborova raqsga tushadi“ telefilmi suratga olingan (1984).