Ajinakamar gʻori

Ajinakamar gʻori — Surxondaryo viloyati Boysun tumanidagi gʻor. Hisor tizmasining janubi-gʻarbiy tarmogʻi boʻlgan Yetimtogʻning gʻarbiy yon bagʻrida, 1241 m balandlikda. Gʻor yuqori yura davri ohaktoshlarida hosil boʻlgan. Kirish qismi ravoq shaklida, eni 3,5 metr, balandligi 4 metr. Gʻor ogʻzida yuqoridan ajralib qulab tushgan balandligi 1,5 metrli xarsang mavjud. Kirish qismidan ichkariga tomon gʻor kengayadi, uzunligi 19 metr, balandligi 16 metrgacha boʻlgan boʻshliqdan iborat. Shipi gumbaz shaklida. Sahnida diametri 2-3 metrli tosh boʻlaklari bor. Birinchi xonaning oxirida gʻor torayib, shu joydan ikkinchi xonaga oʻtiladi. Uning uzunligi 20 metr, eni 3-10 metr, balandligi 7 metrgacha. Bu xona atrofi marmar oniksidan tashkil topgan hosilalar (stalaktit va stalagmit)dan iborat. Suv tomchilari kuzatiladi. Gʻor havosining harorati 16°, kirish qismida 28°. Gʻorning umumiy uzunligi 48 metr, umumiy maydoni 339 metrkvadrat, hajmi 1585 m3.