Abdimajid Poʻlatov
| Abdimajid Qayumovich Poʻlatov | |
|---|---|
| Tasvir yaratishda xatolik: | |
| Tavalludi |
1949-yil 4-mart Toshkent |
| Vafoti |
2017-yil 23-may AQSH |
| Kasbi | olim |
| Sohasi | fizika-matematika, ingliz tili, tilshunoslik, oʻzbek tili va oʻzbek kompyuter lingvistikasi |
| Ish joylari | Oʻzbekiston Milliy Universiteti |
| Taʼlimi | Novosibirsk Davlat Universiteti |
| Ilmiy darajasi | fizika-matematika fanlari doktori, falsafa fanlari doktori |
| Ilmiy unvoni | professor |
| Veb-sayt | https://www.abdimajidpulatov.com |
Abdimajid Qayumovich Poʻlatov (1949-yil 4-mart, Toshkent – 2017-yil 23-may, AQSH) – oʻzbek olimi, fizika-matematika fanlari doktori, professor, oʻzbek kompyuter lingvistikasi boʻyicha mutaxassis olim.
Hayoti
Abdimajid Qayumovich Poʻlatov 1949-yil 4-martda Toshkentda tugʻilgan[1]. 1966-1971-yillarda Novosibirsk Davlat Universiteti matematika fakultetida oʻqigan. 1971-1979-yillarda Novosibirskdagi SSSR Fanlar akademiyasi Sibir boʻlimi Matematika institutida ilmiy xodim boʻlib ishlagan. 1976-yilda fizika-matematika fanlari nomzodi, 1979-1994-yillarda Toshkent davlat universiteti amaliy matematika va mexanika fakulteti dotsenti, 1980-1992-yillarda brilliant bichish usullari boʻyicha qator grantlar sohibi, dasturlar rahbari boʻlgan. 1992-yilda fizika-matematika fanlari doktori, 1994-2000-yillarda Toshkent Davlat Universiteti matematika va mexanika fakulteti professori, 2000-2002-yillarda Oʻzbekiston Milliy Universiteti kompyuter texnologiyalari fakulteti professori, 2002-2006-yillarda Oʻzbekiston Milliy Universiteti Oʻzbek filologiyasi fakulteti Kompyuter lingvistikasi kafedrasi mudiri boʻlib ishlagan.
2006-yilda Oʻzbekiston Milliy Universiteti granti asosida „Koʻzi ojiz talabalarga kompyuterda ishlashni oʻrgatish va kompyuterni koʻzi ojizlarga moslashtirish“ loyihasiga rahbarlik qilgan. 2006-2017-yillarda Oʻzbekiston Milliy Universiteti Oʻzbek filologiyasi fakulteti Umumiy tilshunoslik va kompyuter lingvistikasi kafedrasi professori boʻlib ishlagan.
1988-yildan beri Abdimajid Qayumovich Poʻlatov rahbarligida 12 ta nomzodlik dissertatsiyasi himoya qilingan. Matematika sohasida „Poʻlatov maktabi“, „Toshkent maktabi“ ilmiy yoʻnalishiga asos solgan. Abdimajid Qayumovich Poʻlatovning dunyo boʻylab 300 dan ziyod shogirdlari bor[2].
Abdimajid Qayumovich Poʻlatov 1994-1998-yillarda Germaniyadagi Xalqaro informatika jamiyati, 1993-yildan Oʻzbekiston matematiklar jamiyati aʼzosidir, „XXI asrning 2000 mashhur olimi“ (Kembrij) kitobiga kiritilgan.
Abdimajid Qayumovich Poʻlatov „Qavariq koʻpyoqlar“ (Novosibirsk, 1992), „Ingliz tili“ (rus tilida, Toshkent, 1998), „Dunyoviy oʻzbek tili“ (T.Moʻminova va I.Poʻlatova bilan hamkorlikda, Toshkent, 2003), „Hayot formulalari“ (qoʻlyozma), „Ingliz tili“ (oʻzbek tilida, qoʻlyozma), „Kompyuter lingvistikasi“ (2 jild, qoʻlyozma)[3], „Inglizcha-oʻzbekcha- ruscha lugʻat“ kitoblari hamda „Kompyuter lingvistikasi“ (S.Muhamedova bilan hamkorlikda. Toshkent, 2007) oʻquv qoʻllanmasi muallifi boʻlgan[4].
Abdimajid Qayumovich Poʻlatov matematika sohasidagina emas, balki ingliz tili, tilshunoslik, oʻzbek kompyuter lingvistikasi[5] yoʻnalishlarida falsafa fanlari doktori, professor sifatida ham kitoblar yozgani sababli AQSHning „Who is who?“ („Kim aslida kim?“) kitobiga, 2002-yilda Londonda nashr etilgan „2000 Outstanding Scientists of the 21st Century“ – 21-asrning 2000 ta atoqli Olimlari" roʻyxatiga kiritilgan.
Abdimajid Qayumovich Poʻlatov 2017-yil 23-mayda AQSHda vafot etdi[2][6].
Manbalar
- ↑ „Абдумажид Пўлатов (1949-2017)“ (2018-yil 28-oktyabr).
- ↑ 2,0 2,1 Жалолов, Бобур „Ўзбекистонлик таниқли олим АҚШда вафот этди“ (2017-yil 25-may).
- ↑ „Abdimajid Qayumovich Po‘latov“.
- ↑ „Abdumajid Po‘latov (1949-2017)“ (2021-yil 3-noyabr).
- ↑ Сайф, Шодиёр „Туркий давлатлар орасида умумий мулоқот учун қайси тил танланиши керак?“ (2011-yil 21-noyabr).
- ↑ „2017 йилда вафот этган ўзбекистонлик давлат ва жамоат арбоблари“ (2017-yil 29-dekabr).