1876–1878-yillardagi Buyuk ocharchilik

1876–1878-yillardagi Buyuk ocharchilik — Britaniya hukmronligi ostidagi Hindistonda yuz bergan ocharchilik. U 1876-yilda kuchli qurgʻoqchilik Dekan yassitogʻligida hosilsizlikka olib kelganidan soʻng boshlangan. Mintaqada ocharchilikning oldini olishga yetadigan oziq-ovqat mahsulotlari ishlab chiqarilgan boʻlsa-da, mustamlakachilarning gʻalla eksporti rekord darajaga yetib, keng miqyosli falokatga sabab boʻldi. Bu ofat ikki yil davomida Hindistonning shimoliy, janubiy va janubi-gʻarbiy hududlariga — Britaniya maʼmuriyatidagi Madras, Panjob, Bombey prezidentliklari hamda Maysur va Haydarobod knyazliklariga taʼsir koʻrsatdi. 1877-yilga kelib ocharchilik shimoliy hududlarga, jumladan, Markaziy viloyatlar va Shimoli-gʻarbiy viloyatlarning ayrim qismlariga ham yoyildi. Ocharchilik, pirovardida, 670 000 kvadrat kilometr (257 000 kv. mil) maydonni qamrab olib, jami 58 500 000 kishilik aholini qiynadi. Ocharchilik oqibatidagi ortiqcha oʻlimlar soni 5,6 milliondan 9,6 million kishigacha deb taxmin qilinadi, yaqinda oʻtkazilgan sinchkov demografik hisob-kitoblar esa bu koʻrsatkich 8,2 million kishini tashkil etganini aniqladi. Bu ocharchilik, shuningdek, 1876–1878-yillardagi Janubiy Hindiston ocharchiligi va 1877-yilgi Madras ocharchiligi nomlari bilan ham mashhur.